– Verda har blitt farlegare og meir uforutsigbar. Difor er det viktig å styrkje tryggleik og beredskap i nordområda gjennom auka nærvær frå styresmaktene. Eit nytt kontor for Nasjonal kommunikasjonsmyndigheit i Tromsø vil vere eit viktig bidrag, seier digitaliserings- og forvaltningsminister Karianne Tung (Ap). 

Over lengre tid er det registrert GPS-forstyrringar i luftrommet i Aust-Finnmark. Jamming – forstyrringar i navigasjonssystem som til dømes GPS – kan føre til at ein ikkje mottar navigasjonsdata. Spoofing av GPS-signal har òg førekome; falske signal gjer det svært vanskeleg å navigere etter GPS fordi fartøy oppfattar at dei er ein annan stad enn dei faktisk er. 

Fleire fiskefartøy har no meldt om slike hendingar på havet. Forstyrringane kan skape store utfordringar for navigasjon og tryggleik til sjøs. 

– Dette er ei utvikling vi tek på alvor, og det er ein viktig grunn til etableringa av Nkom-kontoret i Tromsø, seier Tung. 

Nkom: Ein viktig landsdel 

– Vi er glade for å kunne etablere eit kontor i ein stor og viktig landsdel. Den tryggleikspolitiske situasjonen har endra seg dei siste åra, og den strategiske tydinga til Nord-Noreg er vesentleg, seier Nkom-direktør John-Eivind Velure. 

Nyleg er det òg rapportert om GPS-forstyrringar på Svalbard og i Barentshavet. Hendingane understrekar behovet for auka tilstadevere i nord. 

– Det er viktig at Nkom er til stades i regionen. Ein robust digital infrastruktur må tole stadig større belastning, og vår tilstadevere gjer at vi kan reagere raskare dersom det oppstår uønska hendingar, seier Velure. 

Kontoret er venta å vere operativt i 2026. 

Tromsø som strategisk bindeledd 

Tromsø blir rekna som eit naturleg bindeledd til både Finnmark og Svalbard. Byen har òg sterke fagmiljø, som gir gode moglegheiter for samarbeid med viktige instansar. 

– Ei etablering her vil gi kortare reiseveg og raskare responstid til strategisk viktige område på Svalbard og i Aust-Finnmark. Samstundes gir Tromsø unike moglegheiter for samlokalisering og samarbeid med sterke fagmiljø, seier Tung. 

Blant dei sentrale aktørane i Tromsø er KSAT, Avinor, Statens vegvesen, Polarinstituttet, politiet og Universitetet i Tromsø. Samarbeidet med desse kan bidra til meir effektiv oppgåveløysing. 

Om Nkom:

Nasjonal kommunikasjonsmyndigheit (Nkom) skal sikre at alle i Noreg har ein trygg og tilgjengeleg digital kvardag, med pålitelege og framtidsretta tenester til rimelege prisar. Nkom sørgjer for at mobil- og datanetta i Noreg er trygge og stabile, også ved dataangrep eller ekstremvêr. 

Hovudkontoret ligg i Lillesand, og etaten har i tillegg regionkontor i Ski, Bergen og Trondheim. Totalt har Nkom 176 medarbeidarar.