No blir smartklokka di tryggare
Utstyr som kan koplast til internett må følgje nye sikkerheitskrav frå 1. august. Produsentar og importørar bør allereie no setje seg inn i dei nye reglane.
TRER I KRAFT 01.08.25: Alle digitale "dingsar" som kan koplast til internett må følgje nye tryggleikskrav.
Foto: Canva
— Det er utarbeidd nye standardar som bransjen kan kjøpe, og det blir tilrådd at norske produsentar, importørar og distributørar brukar tida fram til 1. august på å sikre at alle nye produkt samsvarer med dei nye krava, seier direktør Espen Slette for spektrumsavdelingen i Nkom.
Det er Nasjonal kommunikasjonsmyndigheit (Nkom) som har ansvaret med å føre tilsyn med elektronisk utstyr i Noreg. Frå hausten vil all marknadskontroll sjåast opp mot dei nye EU-krava – som skal hindre cyberangrep mot nettet, svindel og misbruk av personopplysningar.
— Dei nye cybersikkerheitskrava er mellom anna knytt til nye krav om autentisering, oppdatert programvare og brukardokumentasjon, for å nemne noko, sier Slette.
Må følgjast opp
Døme på produkt som omfattast av dei nye krava er smartklokker, robotstøvsugarar, babycall, smarthussystem, røykvarslarar, men også automatiske bomsystem, ladesystem for elbil, radarar og anna utstyr som kan kommunisere anten over internett eller trådlaust.
Med andre ord er det stor variasjon i kva for produkt dette faktisk gjeld, så det nye EU-kravet vil påverke ein stor del av distribusjonsmarknaden
Dei nye krava gjeld utstyr som blir produsert frå 1. august. Men varer som er lagerførte før denne datoen, kan framleis seljast i butikkane. Slette rår derfor forbrukarar til å vere medvitne når dei handlar i butikken.
— Det er lurt å stille spørsmål om kor sikre produkta dei vurderer å kjøpe er. Kjøper ein utstyr frå utlandet over internett, er det større sannsyn for at produkta ikkje oppfyller krava.
Les mer: No aukar tryggleiken i utstyr som smartklokker og robotstøvsugarar
Her kan du lese meir om Cybersikkerheitskrav i radioutstyrsdirektivet og Cyber Resilience Act.
Har du spørsmål om dei nye cybersikkerheitskrava, kan du ta kontakt med Nkom, eller kanskje finn du svaret på denne sida med Spørsmål og svar - Nye cybersikkerheitskrav til utstyr - RED og CRA.
EN 18031-1:2024 Common security requirements for radio equipment Internet connected radio equipment EN 18031-2:2024 Common security requirements for radio equipment - Part 2: radio equipment processing data, namely Internet connected radio equipment, childcare radio equipment, toys radio equipment and wearable radio equipment EN 18031-3: 2024 Common security requirements for radio equipment - Part 3: Internet connected radio equipment processing virtual money or monetary value
Aktuell informasjon: